KHUTBAH JUM'AT : TUJUAN HIRUP MANUSA

Jum’at, 22 Mei 2015/

TUJUAN HIRUP MANUSA   

اَلْحَمْدُ لِلهِ نَحْمَدُهُ وَنَسْتَعِيْنُهُ وَنَسْتَغْفِرُوْهُ وَنَعُوْذُ بِاللهِ مِنْ سُرُوْرِ اَنْفُسِنَا وَمِنْ سَيِّئَاتِ اَعْمَالِنَا مَنْ يَّهْدِى اللهُ فَلَا مُضِلَّ لَهُ وَمَنْ يُّضْلِلْهُ فَلَا هَادِيَ لَهُ. اَشْهَدُ اَنْ لَّااِلَهَ اِلَّااللهُ وَاَشْهَدُ اَنَّ مُحَمَّدًا عَبْدُهُ وَرَسُوْلُهُ. اَللَّهُمَّ فَصَلِّ وَسَلِّمْ عَلَى هَذَا النَّبِيِّ الْكَرِيْمِ وَعَلَى اَلِهِ وَصَحْبِهِ اَجْمَعِيْنَ. اَمَّا بَعْدُ, فَيَااَيُّهَا الْحَاضِرُوْنَ اُوْصِيْكُمْ وَاِيَّايَ بِتَقْوَى اللهِ وَاَحُثُّكُمْ عَلَى طَاعَتِهِ.

Sadaya Puji kagungan Alloh Rabbul Alamin. Urang manjatkeun rasa Syukur ka Alloh SWT. Kalayan Rohmat sareng Izin Alloh, Alhamdulillah urang sadayana masih dipaparinan umur dugikeun ka dinten iyeu dinten Jum'at anu pinuh ku kamuliaan.

Saparantosna muji-muja ka Hadirot Ilahi Robbi, Shalawat sinareng salam mugia salamina tetep dilimpahkeun ka jungjunan urang sadaya, Kanjeng Nabi Muhammad SAW, Oge ka sadaya kulawargina, ka para Sahabatna, sareng ka sadaya pengikutna dugikeun ka akhir zaman. Amin ya robbal alamin. Henteu aya anu langkung pantes Dina kasempatan Jum'at iyeu kecuali urang saling nasehatkeun dina wasiat taqwa, khususna kanggo diri simkuring pribadi sareng umumna kasadaya jama'ah, hayu urang sami-sami Taqwa ka Alloh SWT, kalayan kataqwaan anu sabener-benerna. Kumargi mung ku taqwa-taqwana jalan kasalametan dunya-akherat.

Hadirin sidang jum’ah rohimakumulloh!

 Urang sadayana salaku umat manusa, kudu rumasa pisan yen gubragna urang ka alam dunya teh dikersakeun ku Alloh SWT. Sabab lamun lahirna ka ieu alam dunya ku tarekahna indung-bapa urang, tinangtu urang bisa milih rupa pangadeg katut kelirna. Sakabeh manusa geus ijma yen euweuh saurang oge anu bakal daek milih goreng rupa, tapi kusabab lain kahayang urang, ieu papasten teh teu bisa ditolak.

هُوَ الَّذِيْ يُصَوِّركُمْ فِى الْاَرْحَامِ كَيْفَ يَشَاءُ

Nya Mantena (Allah) anu nyiptakeun aranjeun dina rahim kalawan sakapalay Mantena

Hadirin Kaum Muslimin! Naon maksadna Alloh nyiptakeun manusa? Atawa naon tujuanana? Ieu pertanyaan moal aya bisa nu ngajawab. Hiji-hijina anu tiasa ngajawab, taya sanes iwal ti Alloh SWT. Dawuhan Alloh swt.

وَمَا خَلَقْتُ الْجِنَّ وَاْلاِنْسَ اِلاَّلِيَعْبُدُوْنَ

Henteu Kami nyiptakeun golongan jin jeung manusa anging supaya aribadah ka Kami.”

Hadirin! Ibadah teh disagigireun sholat, puasa jeung sajabana, seueur deui ibadah anu sanesna. Sakumaha sasauran ulama:

اَلْعِبَادَةُ اِسْمٌ جَامِعٌ لِمَا يُحِبُّهُ وَيَرْضَاهُ قَوْلًا كَانَ اَوْفِعْلًا

“ari anu kasebut ibadah teh nyaeta sakabeh kecap atawa lampah anu dipikarido tur dipikacinta ku Alloh swt.”

Jadi, jelas yen tujuan hirup manusa, pangna didamel ku Alloh swt teh supaya ngabaktikeun dirina, ibadah ka Alloh SWT.

Maka ahirna sakabeh manusa bakal maot, jeungna engke di yaumil kiamah bakal dibangkitkeun, dihirupkeun deui, keur nanggungjawab amal-amal anu geus dipigawe dialam dunya ieu.

Sing saha anu beurat timbangan amalna kana kasaean, maka jalma anu model kitu jalma anu untung

Sing saha anu hampang timbangan amalna atawa loba dosana, maka eta jalma rugi. Maranehanana langgeng dina naraka. Kumargi kitu urang hirup dialam dunya ieu ulah nepika poho ka Alloh swt. Poho kana ibadah akhirna urang cilaka dunya aherat.

Hadirin sidang jum’ah anu mulya

Mudah-mudahan urang sadayana sing tiasa ngalakksanakeun ibadah anu sakumaha mistina. Amin yaa robbal alamin.

بَارَكَ اللهُ لِيْ وَلَكُمْ فِى الْقُرْاَنِ الْعَظِيْم. وَنَفَعَنِيْ وَاِيَّاكُمْ بِاْلاَيَاتِ وَالذِّكْرِ الْحَكِيْمِ. وَتَقَبَّلَ مِنِّيْ وَمِنْكُمْ تِلاَوَتَهُ اِنَّهُ هُوَ السَّمِيْعُ الْعَلِيْمُ