KHUTBAH JUM'AT: WAJIB SYUKURAN KANA NI’MAT

Jum’at, 24 Juli 2015/

WAJIB SYUKURAN KANA NI’MAT    

اَلْحَمْدُ لِلهِ اَمَرَنَا بِاَنْ نَشْكُرَ اْلِاحْسَانَ, وَالَّذِيْ هَدَانَا اِلَى اْلِاسْلَامِ وَاْلِاْيمَانِ. واَشْهَدُ اَنْ لَّااِلَهَ اِلَّااللهُ وَاَشْهَدُ اَنَّ مُحَمَّدًا عَبْدُهُ وَرَسُوْلُهُ. اَللَّهُمَّ فَصَلِّ وَسَلِّمْ عَلَى هَذَا النَّبِيِّ الْكَرِيْمِ وَعَلَى اَلِهِ وَصَحْبِهِ اَجْمَعِيْنَ. اَمَّا بَعْدُ, فَيَااَيُّهَا الْحَاضِرُوْنَ اُوْصِيْكُمْ وَاِيَّايَ بِتَقْوَى اللهِ فَاِنَّهُ يُحِبُّ الْمُتَّقِيْنَ.

Sadaya Puji kagungan Alloh SWT anu parantos nuduhkeun ka urang sadayana kana islam oge iman. Urang manjatkeun rasa Syukur ka Alloh SWT. Kalayan Rohmat sareng Izin Alloh, Alhamdulillah urang sadayana masih dipaparinan yuswa oge kasehatan dugikeun ka dinten iyeu dinten Jum'at anu pinuh ku kamuliaan sareung kaberkahan.

Shalawat sinareng salam mugia salamina tetep dilimpahkeun ka jungjunan urang sadaya, Kanjeng Nabi Muhammad SAW, Oge ka sadaya kulawargina, ka para Sahabatna, sareng ka sadaya pengikutna dugikeun ka akhir zaman. Amin ya robbal alamin. Simkuring salaku khotib khususna kanggo diri simkuring pribadi sareng umumna kasadaya jama'ah, hayu urang sami-sami Taqwa ka Alloh SWT, kalayan kataqwaan anu sabener-benerna. Kumargi mung ku taqwa-taqwana jalan kasalametan dunya-akherat.

Hadirin sidang jum’ah rohimakumulloh!

Manusa lahir ka alam dunya ieu henteu terang kana naon-naon, tapi Allah SWT, parantos nyadiakeun alat-alat anu bakal diperlukeun keur ngawelah hirup diaalam dunya ieu, sakumaha dawuhana-Na dina Al-Qur’an Surat An-Nahl: 78

وَاللهُ اَخْرَجَكُمْ مِنْ بُطُوْنِ اُمَّهَاتِكُمْ لاَتَعْلَمُوْنَ شَيْئًا وَجَعَلَ لَكُمُ السَّمْعَ وَالْاَبْصَارَ وَالْاَفْئِدَةَ لَعَلَّكُمْ تَشْكُرُوْنَ

“Alloh geus ngaluarkeun ka aranjeun ka alam dunya, kalawan perantaraan beuteung-beuteung indung aranjeun, sedengkeun kaayaan aranjeun henteu nyaho nanaon, maka Alloh swt, mere ka aranjeun ceuli, panon, hate supaya aranjeun salukuran”

Alat-alat anu diluhur nembe mangrupikeun kani’matan anu pohara gedena.sabab lamun diantara salah sahiji alat anu diluhur teu aya didiri urang, saupama panon karasa kani’matan urang henteu sampurna, komo mun seug anu teu aya teh hate tanwande urang moal bisa mikir anu sampurna.

Sakabeh perkara anu aya dialam dunya ieu timimiti pepelakan, sasatoan, barang-barang logamna kayaning emas, perak jeung lianna, eta teh disadiakeun ku Alloh swt keur ummat manusa, supaya ku urang dimanfaatkeun.

Para Hadirin anu mulya! Sawajibna pikeun sakabeh manusa, syukuran kana ni’mat Alloh swt nyaeta syukur anu ngandung harti nganuhunkeun kana sagala ni’mat anu geus dibikeun kamanehanana. Syukuran ieu geus diwajibkeun ku Alloh swt sakumaha pidawuhna dina Al-Qur’an Surat An-Nahl ayat 114:

وَاشْكُرُوْا نِعْمَتَ اللهِ اِنْ كُنْتُمْ اِيَّاهُ تَعْبُدُوْنَ

“kudu salukuran aranjeun kana ni’mat ti Alloh lamun aranjeun bener-bener sumembah kamanten-Na.”

Lamun urang nilik kana kaayaan jungjunan urang sadayana kangjeung Nabi Muhammad saw, anu geus dijamin ku Alloh jadi ahli surga, bebas tina dosa-dosa, tapi tetep anjeuna ngaraios sieun jeung keueung paur teu dilebetkeun ku Alloh swt kana golongan jalma anu syukuran.”

Kitu prilaku Kangjeung Muhammad saw, anu payus pisan urang salaku ummatna nyonto kana akhlak talajak anjeuna.

Hadirin sidang jum’ah anu mulya

Akhirna hayu urang sami-sami ngadu’a ka Alloh swt Mudah-mudahan urang sadayana dilebetkeun kana golongan jalma anu tiasa syukuran ka Mantenna. Amin yaa robbal alamin.

بَارَكَ اللهُ لِيْ وَلَكُمْ فِى الْقُرْاَنِ الْعَظِيْم. وَنَفَعَنِيْ وَاِيَّاكُمْ بِاْلاَيَاتِ وَالذِّكْرِ الْحَكِيْمِ. وَتَقَبَّلَ مِنِّيْ وَمِنْكُمْ تِلاَوَتَهُ اِنَّهُ هُوَ السَّمِيْعُ الْعَلِيْمُ