Khutbah Jum'at Sunda, Tujuan Ibadah

Jum’at, 18 Januari 2019

TUJUAN IBADAH

اَلْحَمْدُ لِلَّهِ رَبِّ الْعَالَمِيْنَ, وَالْعَاقِبَةُ لِلْمُتَّقِيْنَ. وَلَا عُدْوَانَ اِلَّا عَلَى الظَّالِمِيْنَ. اَشْهَدُ اَنْ لَّااِلَهَ اِلَّااللهُ وَاَشْهَدُ اَنَّ مُحَمَّدًا عَبْدُهُ وَرَسُوْلُهُ. اَللَّهُمَّ فَصَلِّ وَسَلِّمْ عَلَى هَذَا النَّبِيِّ الْكَرِيْمِ وَعَلَى اَلِهِ وَصَحْبِهِ اَجْمَعِيْنَ. اَمَّا بَعْدُ, فَيَااَيُّهَا الْحَاضِرُوْنَ اُوْصِيْكُمْ وَاِيَّايَ بِتَقْوَى اللهِ وَاَحُثُّكُمْ عَلَى طَاعَتِهِ. فقال الله تعالى في كتابه الكريم أعوذ بالله من الشيطان الرجيم لَقَدْ خَلَقْنَا الإنْسَانَ فِي أَحْسَنِ تَقْوِيمٍ

Saparantosna muji syukur ka hadirot Alloh swt. Shalawat sinareng salamna mugia salamina tetep dilimpahkeun ka jungjunan urang sadaya, Kanjeng Nabi Muhammad SAW, ka sadaya kulawargina, para Sahabatna, sareng ka sadaya pengikutna dugikeun ka akhir zaman, oge mudah-mudah urang sadayana kengeng syafatul udma ti anjeuna. Amin Ya Robbal Alamin. Khotib wasiat, khususna kanggo diri khotib pribadi sareng umumna kasadaya jama'ah, hayu urang sami-sami Taqwa ka Alloh SWT, kalayan kataqwaan anu sabener-benerna. Nyaeta kujalan, ngalaksanakeun naon rupi anu diparentahkeun ku Alloh SWT, sareng nebihan sagala rupi anu dilarang-Na. Oge pamudah-mudahan urang sadayana kalebet jalmi anu taqwa. Amin ya robbal alamin.

Hadirin Kaum Muslimin Rahimakumullah

Teu aya hiji rupa ogè anu dilakukeun tanpa tujuan anu tangtu boh tujuan umum atawa tujuan khusus. Memang loba pisan tujuan diwajibkeunana ibadah saperti loba rupa-rupa ibadah. Dina kasempatan khutbah ayeuna ki simkuring baris dipayunkeun 3 rupa tujuan utama tina ibadah nyaèta:

Kahiji: Pikeun mertahankeun martabat manusa anu meunang sebutan makhluk Alloh anu hade, mulya jeun suci.

Sakumaha kauninga ku sadayana yen Gusti Alloh geus netepkeun yen manusa tèh makhluk anu hade mungguh Alloh, hade rupana, adeg pangadegna, hade cara hirup jeung kabiasaanana upama dibandingkeun jeung makhluk Alloh sejena. Dawuh Alloh swt:

لَقَدْ خَلَقْنَا الإنْسَانَ فِي أَحْسَنِ تَقْوِيمٍ

"Saenyana Kami geus nyiptakeun manusa dina adeg pangadeg anu panghadena"

Salian ti adeg pangadeg anu hade, Alloh swt geus nhamulyakeun manusa sakumaha pidawuh-Na:

وَلَقَدْ كَرَّمْنَا بَنِي آدَمَ وَحَمَلْنَاهُمْ فِي الْبَرِّ وَالْبَحْرِ وَرَزَقْنَاهُم مِّنَ الطَّيِّبَاتِ وَفَضَّلْنَاهُمْ عَلَىٰ كَثِيرٍ مِّمَّنْ خَلَقْنَا تَفْضِيلًا

Al-Isra ayat 70

Hadirin kaum muslimin!

Kahadean, kamulyaan jeung kasucian manusa bisa leungit ku 3 perkara:

1. Lantaran manusa turut kana napsuna sorangan

Sakumaha di dawuhkeun ku Gusti Alloh dina Surat Yusuf ayat 53

إِنَّ النَّفْسَ لَأَمَّارَةٌ بِالسُّوءِ

"Saenyana ari napsu baris ngadorong kana kagorengan"

2. Lantaran manusa loba milampah dosa

Dosa anu dipilampah baris ngaleungitkeun kahadean, kamulyaan jeung kasucian manusa, dawuhan Alloh swt dina Surat Al Muthaffifiin ayat 14:

كَلَّا ۖ بَلْ ۜ رَانَ عَلَىٰ قُلُوبِهِم مَّا كَانُوا يَكْسِبُونَ

"Inget saenyana pagawean dosa maranehna geus nyebabkeun kotorna hate maranehna"

3. Lantaran ninggalkeun amal sholeh

Dimana amal sholeh ditinggalkeun ku manusa manehna baris dibalikkeun tina hade  jadi goreng. Tina  mulya jadi hina, tina suci jadi kotor. Perhatoskeun dawuhan Alloh swt

ثُمَّ رَدَدْنَاهُ أَسْفَلَ سَافِلِينَ (٥) إِلَّا الَّذِينَ آمَنُوا وَعَمِلُوا الصَّالِحَاتِ فَلَهُمْ أَجْرٌ غَيْرُ مَمْنُونٍ

"Tuluy Kami malikkeun maranehna kana darajat anu panghinana kajaba maranehna anu iman jeung amal soleh, pikeun maranehna ganjaran anu teu aya wates wangenna." (Qs. Attin ayat 5-6)

Para wargi ahli jum'ah rohimakumulloh

Anu KADUA: tujuan utama tina ibadah nyaèta Nyukseskeun Tugas Khalifah

Manusa salian ti ibadah tèh ngabogaan tugas salaku khalifah, nyaèta anu ngolah, ngatur, ngamangfaatkeun atawa ngama'murkeun ieu alam dunya. Alloh ngadawuh:

هُوَ أَنشَأَكُم مِّنَ الْأَرْضِ وَاسْتَعْمَرَكُمْ فِيهَا

"Anjeuna anu parantos nyipatkeun manusa jeung ngajadikeun aranjeun salaku tukang ngaramekeunana" Qs. Hud ayat 61

Anu KATILU: Pikeun milarian karidoan Alloh SWT

Tujuan akhir tina sagala rupa ibadah anu dipilampah nyaeta pikeun milarian karidoan Alloh Swt. Alloh ngadawuh:

إِنَّ الَّذِينَ آمَنُوا وَعَمِلُوا الصَّالِحَاتِ أُولَٰئِكَ هُمْ خَيْرُ الْبَرِيَّةِ (7) جَزَاؤُهُمْ عِندَ رَبِّهِمْ جَنَّاتُ عَدْنٍ تَجْرِي مِن تَحْتِهَا الْأَنْهَارُ خَالِدِينَ فِيهَا أَبَدًا ۖ رَّضِيَ اللَّهُ عَنْهُمْ وَرَضُوا عَنْهُ ۚ ذَٰلِكَ لِمَنْ خَشِيَ رَبَّهُ

"Saenyana jalma-jalma anu ariman jeung amal soleh maranehna tèh ngarupakeun makhluk anu pang hadena. Balesa pikeun maranehna nyaèta surga 'Adn anu cur cor cai dihandapna, langgeng maranehna di jerona, Alloh rido ka maranehna jeung maranehna ridho ka Alloh, tah nu kitu ganjaran pikeun jalma anu sieun ku Pangeranana (Qs. Al Bayyinah 7-8)

Hadirin rohimakumulloh !

Mudah-mudahan Alloh masihan hidayah ka urang sadaya sangkan tiasa ngalaksanakeun ibadah anu sakumaha di contokeun ku Kangjeung Nabi. Amin yaa robbal alamin.

بَارَكَ اللهُ لِيْ وَلَكُمْ فِى الْقُرْاَنِ الْعَظِيْم. وَنَفَعَنِيْ وَاِيَّاكُمْ بِاْلاَيَاتِ وَالذِّكْرِ الْحَكِيْمِ. وَتَقَبَّلَ مِنِّيْ وَمِنْكُمْ تِلاَوَتَهُ اِنَّهُ هُوَ السَّمِيْعُ الْعَلِيْمُ

#khutbah sunda, #contoh khutbah sunda, #khutbah Jum’at